Plattdütscher Läsewettstriet wass taugange.
Bi dei välen Spraoken mott Plattdütsch eine faste Stäe häbben.
Siet Wäken wüdd nu in use Schaulen weer Plattdütsch läsen un hört. Dei Läsewettstriet staiht an. Blots mit dat Schnacken klappt dat faoken nich so gaut. Do möt dann Omas un Opas tau Huuse naohelpen. Dei Grotöllern käönt disse Spraoke. Dat is ehre Mauderspraoke. Sei häbbt läwelang all twei Spraoken. Gott sei Dank is dat mit Plattdütsch inne lessden Johre höger rupp gaohn, aower noch nich naug. Kinner sünd neiwinnig un willt gerne Plattdütsch schnacken. Mehr Spraoken is mehr Bildung. Kinner in `t drütte un veierte Schauljohr lert jao uck all Englisch. Englisch ist dei Weltspraoke. Aohne dei kummps vandaoge nich mehr wiet. Inne lessden Wäken häbb ick in Schaulen Kinner Plattdütsch vörläst, Kinner läsen un singen laoten. Du kunns `ne Knöpnaodel falln hörn, so neiwinnig un gespannt möken sei dei ganze Stunn`n mit. Sei häbbt drocke markt: Well Plattdütsch kann, lert masse lichter Englisch off `ne ännere Spraoke. Vandaoge sitt`t inne Klassen väle Kinner van Utlänner. Aale häbbt ehre Mauderspraoke mitbröcht. Un bi us lert sei nu dei tweite Spraoke (Hochdütsch) un dei drütte Spraoke (Englisch). In eine 4. Grundschaulklasse van 24 Kinner wassen 12 Kinner ut: Russland, Serbien, Kroatien, Polen, Afganistan, Uganda, Indien, Irak un Holland. Tauhuuse schnackt sei in ehre Mauderspraoke un bi `t Inkoopen un ünnerwägns Hochdütsch. Dei lüttke Joshi ut Uganda meldete sick nao korte Tied un lees den Anfang vanne Geschichte aohne Fählers vör. Hei har aals verstaohn. Kalinka ut Serbien spälde in ein`n lüttken Sketch ehre Rolle wunnerbor. Un Mattes ut Polen kunn mutz dat Gedicht van Augustin Wibbelt: Pöggsken sitt in Sünnenschien“. In dei Riege van dei välen ännern Spraoken mott use Plattdütsch eine faste Stäe kriegen. Dat gaiht blots, wenn wi in Alldag mitn`änner Plattdütsch schnackt. Fangt dat maol fortsen an. „Wo gaiht di dat? Wo laote is dat? Maok dei Dörn tau! Sett di hen! Schnack luuter! Wanneiher kummps du?“ Use plattdütsche Spraoke is Heimat. Hier bin ick tau Huuse! Hier kaom ick her! Wenn wi use Mauderspraoke verkaomen laot un wi taulaot, dat ehr dei Grund ünnere Fäute wechtrocken wedd, dann kummps an `t Strumpeln un bis narnsnich tau Huus. Aohne Spraoke – kien Läwen! Mi häff inne Klasse dei Junge ut Syrien beduurt. Hei was vör drei Wäken nao Dütschland kaomen un kunn kien Wort verstaohn off use Baukstaoben schriewen. At ick üm Biller van Veih wiesde, sä hei ganz verstört dei Näöms up Syrisch.